நிகழ்வுகள்

// நன்றாற்ற லுள்ளுந் தவறுண்டு அவரவர் பண்பறிந் தாற்றாக் கடை (திருக்குறள்) (பொருள்: அவரவருடைய இயல்புகளை அறிந்து அவரவருக்குப் பொருந்துமாறு செய்யாவிட்டால், நன்மை செய்வதிலும் தவறு உண்டாகும். மு.வ.) //

ஞாயிறு, 22 ஏப்ரல், 2018

ஆச்சார்யா பொறியியல், தொழில்நுட்பக் கல்லூரி ஆண்டு விழா!







புதுச்சேரிவில்லியனூரில் அமைந்துள்ள ஆச்சார்யா பொறியியல், தொழில்நுட்பக் கல்லூரியில் 20.04.2018 மாலை நடைபெற்ற ஆண்டுவிழாவில் கலந்துகொண்டு, உரையாற்றும் அரிய வாய்ப்பு எனக்கு அமைந்தது. "உலகத் தரத்திலான கல்வி" (world Class Education) என்னும் மூல மந்திரத்தை இலக்காகக் கொண்டு நடைபெறும் இக்கல்லூரியின் மேலாண்மை இயக்குநர் திரு. ஜெ. அரவிந்தன் அவர்களின் தலைமையில் நடைபெற்ற ஆண்டு விழாவில் ஆயிரக்கணக்கான மாணவர்கள் கலந்துகொண்டனர். தமிழர்களின் தொழில்நுட்ப அறிவைச் சுருக்கமாக எடுத்துரைத்து, உரையாற்றினேன். பல்வேறு போட்டிகளில் வெற்றிபெற்ற மாணவர்களுக்குச் சான்றிதழ்களை வழங்கினேன். கல்லூரி முதல்வர் முனைவர் எல்.இராமச்சந்திரன் அவர்களும் பல்வேறு துறைகளைச் சேர்ந்த பேராசிரியர்களும், மாணவர்களும் இந்த நிகழ்ச்சிக்குரிய ஏற்பாடுகளைச் சிறப்பாகச் செய்திருந்தனர். புதிய புதிய மாணவர்களைச் சந்திக்கும் இதுபோன்ற விழாக்களில் உரையாற்றுவது தமிழால் கிடைத்த பேறு என்றே சொல்லவேண்டும்.



செவ்வாய், 17 ஏப்ரல், 2018

கங்கைகொண்ட சோழபுரத்தில் உலகத் தொல்காப்பிய மன்றம் கிளை தொடக்கம்!



  தமிழறிஞர்கள் கு.சிவமணி, க.இராமசாமி, செ.வை.சண்முகம், பெஞ்சமின் இலெபோ உள்ளிட்டோர் முன்னிலையில் சோழன்குமார் அவர்கள் உலகத் தொல்காப்பிய மன்றத்தின் தலைமை அலுவலகத்தின் கல்வெட்டைத் திறந்துவைத்தல்.

     வரலாற்றுச் சிறப்புமிக்க கங்கைகொண்டசோழபுரத்தில் 2018, ஏப்ரல் 15 ஆம் நாள், ஞாயிற்றுக் கிழமை மாலை 4 மணிக்கு உலகத் தொல்காப்பிய மன்றத்தின் கிளை தமிழறிஞர்களின் முன்னிலையில் தொடங்கப்பட்டது. உலகத் தொல்காப்பிய மன்றம் என்பது தொல்காப்பியம் என்ற தமிழ் இலக்கண நூலை உலக அளவில் பரப்பும் அமைப்பாகும். இந்த அமைப்பின் கிளை கனடா, மலேசியா, ஜப்பான் உள்ளிட்ட நாடுகளில் மிகச் சிறப்பாக இயங்குகின்றது.

     அரியலூர் மாவட்டம், குருகாவலப்பர்கோவில் மீரா மகாலில் நடைபெற்ற தொடக்க விழாவில்  திருவாளர்கள் சுகுமார், அருண் குழுவினரின் நாகசுர இன்னிசை  முழங்க, உலகத் தொல்காப்பிய மன்ற நிகழ்ச்சிகள் தொடங்கின. செம்மொழி நிறுவனத்தில் முன்னைப் பொறுப்பு அலுவலராகப் பணியாற்றிய பேராசிரியர் க. இராமசாமி அவர்களின் தலைமையில் நிகழ்ச்சி தொடங்கியது. அண்ணாமலைப் பல்கலைக்கழகத்தின் மொழியியல் துறையில் பேராசிரியராகப் பணியாற்றிய முனைவர் செ.வை. சண்முகம், பிரான்சு நாட்டின் பேராசிரியர் பெஞ்சமின் இலெபோ, நெதர்லாந்து நாட்டின் பொறியாளர் கோபி இரமேஷ் ஆகியோர் சிறப்பு விருந்தினர்களாக வருகை தந்து உரையாற்றினர்.

     இந்த நிகழ்ச்சிக்குச் சிறப்பு அழைப்பாளராக அய்வறிஞர் கு. சிவமணி (மேனாள் முதல்வர், கரந்தைத் தமிழ்க் கல்லூரி), அழைக்கப்பட்டு, தகுதியுரை வழங்கினார். உலகத் தொல்காப்பிய மன்றத்தின் செயலாளர் முனைவர் மு.இளங்கோவன் உலகத் தொல்காப்பிய மன்றத்தின் நோக்கங்களை எடுத்துரைத்து, உ.தொ. மன்றம் தோன்றிய வரலாற்றினை நினைவுகூர்ந்து உரையாற்றினார்.

     மொழியியல் அறிஞர் செ.வை.சண்முகம் அவர்களுக்குத் "தொல்காப்பிய ஆய்வறிஞர்" என்னும் விருதும், பேராசிரியர் க. இராமசாமி அவர்களுக்குச் "செம்மொழிச் செம்மல்" என்ற விருதும் வழங்கிப் பாராட்டப்பட்டது.
முனைவர் க.இராமசாமி அவர்களுக்குச் செம்மொழிச் செம்மல் என்னும் விருதளித்துப் பாராட்டும் சோழன் குமார் அவர்கள்

மொழியியல் அறிஞர் செ.வை.சண்முகம் அவர்களுக்குத் தொல்காப்பிய ஆய்வறிஞர் என்னும் விருதளித்துப் பாராட்டும் ஆய்வறிஞர் கு. சிவமணி அவர்கள்

     பல்வேறு தமிழ்ப்பணிகள் செய்த  மூத்த தமிழறிஞர்களான முனைவர் அ. ஆறுமுகம், புலவர் மா. திருநாவுக்கரசு, புலவர் மு. செல்வராசனார், புலவர். கு. கணேசமூர்த்தி, புலவர் சு. இராசகோபால், புலவர் ஆலவாய் அ. சொக்கலிங்கம், புலவர் சி. பன்னீர்செல்வம், மா. சுப்பிரமணியன் ஆசிரியர், பூவை. சு. செயராமன், ஆகியோரைத் தமிழ் ஆர்வலர் சோழன் குமார் சிறப்பித்து, நினைவுப் பரிசு வழங்கினார்.

     உலகத் தொல்காப்பிய மன்றத்தின் தலைமை அலுவலகத்தின் கல்வெட்டினைத் தமிழ் ஆர்வலர் திரு. சோழன்குமார் திறந்துவைத்தார். பேராசிரியர் இ. சூசை, முனைவர் ப. பத்மநாபன், முனைவர் உ. பிரபாகரன்,  முனைவர் சா. சிற்றரசு,  முனைவர் அ. சிவபெருமான், பேராசிரியர் ச. திருஞானசம்பந்தம், செ. திருவாசகம் ஆகியோர் வாழ்த்துரை வழங்கினர்.

     பொறியாளர் இரா. கோமகன் குத்துவிளக்கேற்றித் தொடங்கிவைத்த இந்த நிகழ்ச்சிக்குத் தியாக. மோகன், கி. முல்லைநாதன் ஆகியோர் முன்னிலை வகித்தனர்.

     உலகத் தொல்காப்பிய மன்றப் பொறுப்பாளர்கள் சு. இளவரசன், ஸ்ரீ. ஸ்ரீகாந்த், கா. செந்தில், செ. திருவள்ளுவன், சா. க. கொளஞ்சிநாதன், கருப்பையன் ஆகியோர் நிகழ்ச்சிக்கான ஏற்பாடுகளைச் செய்திருந்தனர்.

     தூ. சடகோபன், பாவலர் கலியபெருமாள் உள்ளிட்ட தமிழ் ஆர்வலர்கள் இந்த நிகழ்ச்சியில் கலந்துகொண்டனர்.

பேராசிரியர் பெஞ்சமின் இலெபோ, திருவாட்டி இலெபோ அவர்கள் சிறப்பிக்கப்படுதல்
புலவர் கு.கணேசமூர்த்தி அவர்களைச் சிறப்பிக்கும் பேராசிரியர் இ. சூசை

உலகத் தொல்காப்பிய மன்றத்தின் இணையதளம் பார்க்க இங்கே செல்லவும்.


சனி, 14 ஏப்ரல், 2018

கங்கைகொண்ட சோழபுரத்தில் உலகத் தொல்காப்பிய மன்றம் கிளை தொடக்கவிழா!





      தமிழில் கிடைத்துள்ள முதல் இலக்கண நூல் தொல்காப்பியம் ஆகும். இதனை உலக அளவில் பரப்பும் அமைப்பு உலகத் தொல்காப்பிய மன்றம் ஆகும். இந்த அமைப்பு பிரான்சில் தொடங்கப்பட்டு, கனடா, மலேசியா, ஜப்பான் நாடுகளில் கிளைகளைக் கொண்டு செயல்படுகின்றது. இந்த அமைப்பின் கிளை வரலாற்றுச் சிறப்புமிக்க கங்கைகொண்ட சோழபுரத்தில் ஏப்ரல் 15 ஆம் நாள், ஞாயிற்றுக் கிழமை மாலை 4 மணிக்குத் தொடங்கப்பட உள்ளது.

      கங்கைகொண்ட சோழபுரத்தை அடுத்துள்ள குருகாவலப்பர்கோவில் மீரா மகாலில் நடைபெறும் தொடக்க விழாவிற்குச் செம்மொழி நிறுவனத்தில் முன்னைப் பொறுப்பு அலுவலராகப் பணியாற்றிய பேராசிரியர் க. இராமசாமி தலைமை தாங்குகின்றார். அண்ணாமலைப் பல்கலைக்கழகத்தின் மொழியியல் துறையில் பேராசிரியராகப் பணியாற்றிய முனைவர் செ.வை. சண்முகம், பிரான்சு நாட்டின் பேராசிரியர் பெஞ்சமின் இலெபோ, நெதர்லாந்து நாட்டின் பொறியாளர் கோபி இரமேஷ் ஆகியோர் சிறப்பு விருந்தினர்களாக வருகைதர உள்ளனர்.

      இந்த நிகழ்ச்சிக்குச் சிறப்பு அழைப்பாளர்களாக அய்வறிஞர் கு. சிவமணி (மேனாள் முதல்வர், கரந்தைத் தமிழ்க் கல்லூரி), பேராசிரியர் இரா. ச. குழந்தை வேலனார் (நிறுவுநர், கடலூர்த் தமிழ்ச்சங்கம்)  அழைக்கப்பட்டுள்ளனர்.

      உலகத் தொல்காப்பிய மன்றத்தின் செயலாளர் முனைவர் மு.இளங்கோவன் உலகத் தொல்காப்பிய மன்றத்தின் நோக்கங்களை எடுத்துரைத்து உரையாற்றுவார்.

      பல்வேறு தமிழ்ப்பணிகள் செய்த  மூத்த தமிழறிஞர்களான புலவர் இ. கோ. குஞ்சிதபாதன் பிள்ளை, முனைவர் அ. ஆறுமுகம், புலவர் மா. திருநாவுக்கரசு, புலவர் மு. செல்வராசனார், புலவர் கூத்தங்குடி அரங்கராசனார், புலவர். கு. கணேசமூர்த்தி, புலவர் சு. இராசகோபால், புலவர் பல்லடம் மாணிக்கம், பண்ணுருட்டி இரா. பஞ்சவர்ணம், புலவர் ஆலவாய் அ. சொக்கலிங்கம், புலவர் சி. பன்னீர்செல்வம், மா. சுப்பிரமணியன் ஆசிரியர், பூவை. சு. செயராமன், ஆகியோரைத் தமிழ் ஆர்வலர் சோழன் குமார் சிறப்பித்து, நினைவுப் பரிசு வழங்க உள்ளார்.

      உலகத் தொல்காப்பிய மன்றத்தின் தலைமை அலுவலகம் திறப்பு விழாவும் இந்த நிகழ்ச்சியில் நடைபெற உள்ளது.

      பேராசிரியர் இ. சூசை, முனைவர் ப. பத்மநாபன், முனைவர் அரங்க. பாரி, முனைவர் க. திலகவதி, முனைவர் உ. பிரபாகரன்,  முனைவர் சா. சிற்றரசு,  முனைவர் அ. சிவபெருமான், செ. திருவாசகம் ஆகியோர் வாழ்த்துரை வழங்க உள்ளனர்.

      பொறியாளர் இரா. கோமகன் குத்துவிளக்கேற்றித் தொடங்கிவைக்கும் இந்த நிகழ்ச்சிக்கு தியாக. மோகன், கி. முல்லைநாதன், ந. பாண்டியன் ஆகியோர் முன்னிலை வகிக்கின்றனர்.

      உலகத் தொல்காப்பிய மன்றப் பொறுப்பாளர்கள் சு.இளவரசன், ஸ்ரீ.ஸ்ரீகாந்த், கா. செந்தில், செ. திருவள்ளுவன், சா. க. கொளஞ்சிநாதன், நா. பாலசுப்பிரமணியன் ஆகியோர் நிகழ்ச்சிக்கான ஏற்பாடுகளைச் செய்துள்ளனர்.

உலகத் தொல்காப்பிய மன்றத்தின் இணையதளம்:  http://www.tholkappiyam.org/

தொடர்புக்கு: 9442029053 /  9786332261

செவ்வாய், 27 மார்ச், 2018

புதுச்சேரியில் விபுலாநந்த அடிகளார் பிறந்தநாளை முன்னிட்டுத் திருவுருவப் படத்துக்கு மலர் வணக்கம்!


தியாகி அப்துல் மஜீது ஐயா அகவணக்கம் செலுத்துதல் 


     இலங்கையில் பிறந்தவர் விபுலாநந்த அடிகளார். இவர் யாழ்நூல் என்ற தமிழ் ஆராய்ச்சி நூலை எழுதி, உலகப் புகழ்பெற்றவர். இலங்கையில் 27 பள்ளிக்கூடங்களை  நிறுவி, ஏழை எளிய மாணவர்கள் கல்வி கற்க வழி செய்தவர். இவரின் பிறந்த நாள் மார்ச்சு 27 ஆகும். விபுலாநந்த அடிகளாரின் பிறந்தநாள் புதுச்சேரியில் உள்ள செகா கலைக்கூடத்தில் இன்று(27.03.2018) கொண்டாடப்பட்டது.

     பாவலர்  தியாகி அப்துல் மஜீது அவர்கள் விபுலாநந்த அடிகளாரின் திருவுருவப் படத்துக்கு மலர் மாலை அணிவித்து, மலர்தூவி, வணக்கம் செய்தார். முனைவர் மு.இளங்கோவன் விபுலாநந்த அடிகளார் ஆவணப்படம் எடுத்த தம் அனுபவங்களையும், விபுலாநந்தரின் சிறப்புகளையும் எடுத்துரைத்தார். பேராசிரியர் இரா. ச. குழந்தைவேலனார் விபுலாநந்த அடிகளாரின் தமிழ்ப்பணிகளையும் ஆராய்ச்சிப்பணிகளையும், சமூகப் பணிகளையும் நினைவுகூர்ந்தார்.

     தூ. சடகோபன், செ. திருவாசகம், சீனு. தமிழ்நெஞ்சன், சீனு. தமிழ்மணி, வில்லியனூர் வெங்கடேசன், கவிஞர் பைரவி, புலவர் கலியபெருமாள், அ. சந்திரகேசகரன், பெ. வளையாபதி உள்ளிட்ட பல்வேறு தமிழ் அமைப்புகளைச் சேர்ந்தவர்கள் இந்த நிகழ்ச்சியில் கலந்துகொண்டனர்.
முனைவர் மு.இளங்கோவன் அகவணக்கம் செலுத்துதல், அருகில் புதுவைத் தமிழறிஞர்கள்
பேராசிரியர் இரா.ச. குழந்தைவேலனார் அகவணக்கம் செலுத்துதல்
திரு. செ. திருவாசகம் அகவணக்கம் செலுத்துதல்

ஞாயிறு, 25 மார்ச், 2018

பத்தொன்பதாம் நூற்றாண்டில் தொல்காப்பியக் கல்வியின் நிலை!



    1885 இல் தொல்காப்பியம் பொருளதிகாரம் - நச்சினார்க்கினியர் உரையைப் பதிப்பித்தபொழுது பதிப்புரையில் சி.வை. தாமோதரம் பிள்ளை இவ்வாறு எழுதுகிறார்:

  "சென்னபட்டணத்தில் இற்றைக்கு ஐம்பதறுபது வருஷத்தின் (1825-இல்) முன்னிருந்த வரதப்ப முதலியாரின்பின் எழுத்துஞ் சொல்லுமேயன்றித் தொல்காப்பியப் பொருளதிகாரத்தை உரையுதாரணங்களோடு பாடங்கேட்டவர்கள் மிக அருமை. முற்றாய் இல்லை என்றே சொல்லலாம். வரதப்ப முதலியார் காலத்திலும் தொல்காப்பியங் கற்றவர்கள் அருமையென்பது அவர் தந்தையார் வேங்கடாசல முதலியார் அதனைப் பாடங்கேட்கும் விருப்பமுடையரான போது பிறையூரிற் திருவாரூர் வடுகநாத தேசிகர் ஒருவரே தொல்காப்பியம் அறிந்தவர் இருக்கிறாரென்று கேள்வியுற்றுத் தமது ஊரைவிட்டு அதிக திரவியச் செலவோடு அவ்விடம் போய் இரண்டு வருஷமிருந்து பாடங்கேட்டு வந்தமையானும், வரதப்ப முதலியார் ஒருவரே பின்பு அதனைத் தந்தைபாற் கேட்டறிந்தவரென்பதனானும், அது காரணமாக அவருக்குத் தொல்காப்பிய வரதப்ப முதலியாரென்று பெயர் வந்தமையானும் பின்பு அவர் காலத்திலிருந்த வித்துவான்கள் தமக்கு யாதாயினும் இலக்கண சமுசயம் நிகழ்ந்துழி அவரையே வினவி நிவாரணஞ் செய்தமையானும் நிச்சயிக்கலாம்". சுமார் கி.பி. 1825 இல் தொல்காப்பியக் கல்வியின் நிலை இது.

நன்றி: 
ச.வே.சுப்பிரமணியன், தொல்காப்பியப் பதிப்புகள், உலகத் தமிழாராய்ச்சி நிறுவன வெளியீடு. 28.04.1992, பக்கம் 9,10 (மேற்கோள்)

வெள்ளி, 9 மார்ச், 2018

வேலூர் கவிஞர் இரா. நக்கீரன்



கவிஞர் இரா. நக்கீரன்(இரா. கிருஷ்ணமூர்த்தி) 

      புதுச்சேரியில் உள்ள பாவேந்தர் பாரதிதாசன் அருங்காட்சியகத்தில் செய்தித் தாள்களை ஆர்வமாகப் புரட்டிக்கொண்டிருந்தேன். அப்பொழுது ஒரு இலக்கியக் குழுவினர் பாவேந்தர் இல்லத்தில் நுழைந்தனர். சுவரில் மாட்டியிருந்த படங்களைப் பார்த்தும், நினைவுப்பொருள்களைச் சுட்டி விளக்கம் கேட்டும், உரையாடியபடியும் அங்குமிங்கும் நடமாடிக்கொண்டிருந்தனர்.

     அக்குழுவில் இருந்த அகவை முதிர்ந்த பெரியவர் ஒருவர், இந்தத் தெருவில் பாவேந்தரைப் பார்ப்பதற்கு முகவரி தெரியாமல் நாங்கள் நடந்தபொழுது, எங்களை அழைத்து, நான்தான் பாரதிதாசன். வாருங்கள்! என்று வரவேற்றார் என்று தம் கடந்த கால அனுபவங்களைப் பகிர்ந்துகொண்டார். இந்த இடத்தில்தான் பாவேந்தர் அமர்ந்திருந்தார்; எங்களை அருகில் அமர வைத்து அன்பாக விருந்தோம்பினார்; நான் இங்குதான் பாவேந்தர் கால்மாட்டில் அமர்ந்திருந்தேன்” என்று அந்த இடத்தைச் சுட்டிக்காட்டியபொழுது அருகிலிருந்தவர்களுக்கு ஆச்சரியமாக இருந்தது. கோவேந்தனுடன் வேலூரிலிருந்து வந்து, பாவேந்தரைச் சந்தித்த அந்த நாளை மறக்க முடியாது என்றார் அந்தப் பெரியவர். ஐம்பதாண்டுகளுக்கு முந்திய நிகழ்வை நினைவுகூர்ந்த அந்தப் பெரியவரின் முகத்தில் மகிழ்வும், பெருமிதமும் போட்டியிட்டுத் தெரிந்தன.

     இவற்றையெல்லாம் உற்றுக் கவனித்துக்கொண்டிருந்த நான் ஐயா, நீங்கள் யார் என்று வினவி, என்னை அறிமுகம் செய்துகொண்டேன். கோவேந்தனைத் தங்களுக்குத் தெரியுமா? என்று கேட்டேன். அவரோ, கோவேந்தன் என் குருநாதர் என்றார். பாரதியார், பாவேந்தர், கோவேந்தன் படங்களைத் தம் இல்லத்தில் வைத்து நாளும் போற்றி மதிப்பதை அவர் உரையாடலின் வழியாகத் தெரிந்துகொண்டேன். பாரதிதாசன் பரம்பரை என்ற தலைப்பில் நான் முனைவர் பட்ட ஆய்வு செய்ததையும், கோவேந்தனுக்கும் எனக்கும் இருந்த தொடர்பையும் சொன்னவுடன் அந்தப் பெரியவருக்கு அடங்காத ஆர்வம். கோவேந்தனின் நண்பர் தங்கப்பா புதுவையில் உள்ளார் என்று அவரே கூறி, அடுக்கடுக்காகப் பேசிக்கொண்டே இருந்தார். பேச்சில் அவர் பிறவி நகைச்சுவையாளர் என்பது தெரிந்தது.

     தங்கப்பாவை உங்களுக்குத் தெரியுமா என்று உரையாடலை மீண்டும் தொடர்ந்தேன். ஐம்பது ஆண்டுகளுக்கு முன் இந்தி எதிர்ப்புப் போரில் பெருஞ்சித்திரனார் ஈடுபட்டு, கைதாகி, வேலூர் சிறையிலிருந்தார். தண்டனைக் காலம் முடிந்து சிறையிலிருந்து வெளிவந்தபொழுது, கோவேந்தன், தங்கப்பா ஆகியோருடன் சென்று சிறைவாயிலில் அவரை வரவேற்றேன் என்று பழைய நினைவுகளைப் பகிர்ந்துகொண்டார். சிறைவாசலிலிருந்து வெளிவந்த பெருஞ்சித்திரனாரின் தியாகத்தைப் போற்றும் வகையில் அவரின் கையைத் தங்கப்பா பற்றிக்கொண்டு அழுததைச் சொன்னதும் பழைய இந்தி எதிர்ப்புப் போராட்டம் பற்றித் தென்மொழி ஏடுகளில் படித்த நினைவுகள் எனக்குத் தோன்றின.

     உடனடியாகத் தங்கப்பாவுடன் தொடர்புகொண்டு வேலூர் அன்பரைப் பற்றிச் சொன்னேன். அவரும் ஆமாம்! ஆமாம்! அவரைத் தெரியும் என்று தம் பழைய நண்பரை நினைவுகூர்ந்தார். இருவரும் தொலைபேசியில் சிறிது நேரம் உரையாட வழியமைத்துத் தந்ததில் எனக்கு மகிழ்ச்சி.

     மாதங்கள் உருண்டோடின. தொலைபேசியில் அந்த பெரியவருடன் என் நட்பு வளர்ந்தது. மீண்டும் புதுவைக்கு வரும் சூழலை அந்தப் பெரியவர் சொன்னபொழுது என் பணிகளை ஒதுக்கிவைத்துவிட்டு அவர் வருகைக்குக் காத்திருந்தேன்.

அவர்தான் வேலூர் கவிஞர் இரா. நக்கீரன்

     கிருஷ்ணமூர்த்தி என்னும் இயற்பெயரைக் கொண்ட கவிஞர் இரா. நக்கீரன் வேலூர் மாவட்டம் காட்டுப்பாடியை அடுத்த தாராப்படைவீட்டில் 26.06.1938 இல் பிறந்தவர். இவரின் பெற்றோர் இராமநாதன், பட்டம்மாள் ஆவர். தமது பதினாறாவது வயதுமுதல் நாடகத்துறையில் தம்மை ஈடுபடுத்திக் கொண்டவர். கவியரங்குகள், பட்டிமன்றங்களில் கலந்துகொண்டு கேட்போர் வியக்க உரையாற்றியவர். கவியரங்குகளில் இசையுடன் பாடி அரங்கத்தை ஆச்சரியத்தில் உறைய வைத்தவர். இவரின் கவிதையைக் கேட்டுக் கவியரசு கண்ணதாசன் “இன்னிசைக் கவிஞர்” என்று பாராட்டியுள்ளார். பாடகர், நடிகர், இயக்குநர், சோதிட ஆராய்ச்சியாளர் என்று பன்முகம் கொண்ட இவர் 42 ஆண்டுகளாகத் தமிழ்நாடு அரசின் நெடுஞ்சாலைத் துறையில் பல்வேறு பொறுப்புகளை வகித்து, பொறியாளராக உயர்ந்து, ஓய்வுபெற்று இப்பொழுது வேலூரில் அமைதி வாழ்க்கை வாழ்ந்து வருகின்றார். எழுத்தும், பேச்சுமாக உள்ள கவிஞர் நக்கீரனுடன் உரையாடியதிலிருந்து பல விவரங்களைப் பெறமுடிந்தது.

     பேரறிஞர் அண்ணா, பாவேந்தர் பாரதிதாசன், சிலம்புச்சொல்வர் ம.பொ.சி. கவிஞர் சுரதா, சிந்தனைச் சிற்பி சி.பி. சிற்றரசு, கவிஞர் கொத்தமங்கலம் சுப்பு, ஆரூர் தாஸ், கவிஞர் சுப்பு ஆறுமுகம், கவிஞர் த. கோவேந்தன், நாரண. துரைக்கண்ணன், ஜஸ்டிஸ் மகாராஜன், பாவாணர், கு. மு. அண்ணல் தங்கோ, பெருஞ்சித்திரனார் தொ.மு.பாஸ்கரத் தொண்டைமான், ஆர். வெங்கட்ராமன் உள்ளிட்ட தமிழகத்துக்கு நன்கு அறிமுகமான அறிஞர்களுடன் நல்ல தொடர்பில் இருந்தவர் இரா. நக்கீரன்.

     திரைத்துறைக் கலைஞர்களான ஜம்பு, ஏடி. கிருஷ்ணசாமி, சித்ரமகால் கிருஷ்ணமூர்த்தி, சித்ராலயா கோபு, டி.என்.பாலு, நடிப்பிசைப் புலவர் கே.ஆர். இராமசாமி, இலட்சிய நடிகர் எஸ்.எஸ். இராஜேந்திரன், நடிகர் இரவிச்சந்திரன், செந்தாமரை, ஆர். முத்துராமன், கவியரசு கண்ணதாசன் உள்ளிட்டவர்களுடன் பழகி, அவர்களின் அன்பையும் ஆதரவையும் பெற்றவர்.

     கல்பனா நாடக மன்றம், ரெயின்போ கிரியேஷன்ஸ் என்ற நாடக மன்றங்களை நிறுவிப் பல நாடகங்களை அரங்கேற்றியவர். இவரின் நாடகங்கள் வேலூர், கோவை, திருச்சி, சென்னை, இராணிப்பேட்டை முதலிய ஊர்களில் நடிக்கப்பட்டுள்ளன. அக்காலத்தில் புகழ்பெற்ற பல நாடகங்களுக்குப் பாடல்களை எழுதியவர். போர்வாள், சீமான் மகள், கனிமொழி, அபலை, வாழ்வும் வளமும், சாம்ரட் அசோகன், மணிமகுடம், டிரைவர் சின்னசாமி, மனமாற்றம், அன்பின் சிகரம், சத்ரபதி மைந்தன், மீர்ஜாபர், என் கதை, ஜம்புலிங்கம், தனிமரம், சுந்திரபல்லவன், வாழ்க்கைத் திருப்பம், சிக்கல், திருட்டு மாமா, குன்றிமணி, மலர்விழி, சுழல், உதிர்ந்த முத்துகள், வாழ்த்துங்கள், பாக்குவெட்டி, ஆட்டுவித்தால் ஆடுகின்றேன், கல்லெல்லாம் மாணிக்கக் கல்லாகுமா, ஐஸ்காரன், இணைகோடுகள், என்னங்க சம்பந்தி, நினைவுகள் அழிவதில்லை உள்ளிட்ட நாடகங்களுக்கு இவர் எழுதிய பாடல்கள் அக்காலத்தில் புகழ்பெற்று விளங்கின.

     வானொலிக்கு மெல்லிசைப் பாடல்கள் எழுதுவதையும் வழக்கமாகக் கொண்டிருந்த. இவரது பாடல்களைத் தமிழகத்தின் புகழ்பெற்ற இசைக்கலைஞர்களான சீர்காழி கோவிந்தராஜன் உள்ளிட்டோர் பாடியுள்ளனர். நடிகர் ஆர் முத்துராமனுக்கு “நவரசத் திலகம்” என்ற பட்டத்தையும், எழுத்தாளர் சோ. இராமசாமிக்கு “நகைச்சுவைத் தென்றல்” என்ற பட்டத்தையும் வழங்கிய பெருமையும் இவருக்கு உண்டு.

     கவிஞர் நக்கீரன் அபலை, டிரைவர் சின்னசாமி, திருப்பம், சிக்கல், சுழல், புதர், சத்ரபதி மைந்தன், சிலம்புச்செல்வி முதலிய ஓரங்க நாடகங்களையும் எழுதியுள்ளார்.

     வேலூரிலிருந்து அக்காலத்தில் வெளிவந்த கவிஞன் என்ற கையெழுத்து ஏட்டுக்கு இணையாசிரியாக இருந்து 16 ஏடுகளை வெளிக்கொண்டு வந்த பெருமையும் இவருக்கு உண்டு. கவிஞன் இதழின் ஆசிரியர் த. கோவேந்தன் ஆவார்.

     கவிஞர் இரா. நக்கீரன் தம் கவிதை, நாடகம், மெல்லிசைப் பணிகளுக்கு இடையிலும் அரசுப்பணியை விடாமல் இருந்து நேர்மையான அதிகாரியாகப் பணியாற்றி, பலருக்கும் உதவியாக வாழ்ந்தவர். தம் மனைவி விஜயலெட்சுமியின் மறைவுக்குப் பிறகு வாழ்க்கையை எளிமையாக அமைத்துக்கொண்ட இவர், தேவைக்கு உரியதை மட்டும் வைத்துக்கொண்டு மற்றவற்றை எளியவர்களுக்கு வழங்கிய ஈகைக்குணம் கொண்டவர். படிக்கும் மாணவர்களுக்கு உதவுவது இவரின் ரத்தத்தில் ஊறிய ஒன்று. தொண்டுணர்வு கொண்ட இப்பெருமகனாருக்கு அகவை எண்பதை நெருங்குகின்றது.

     இசைப்பாடல்கள் இயற்றுவதிலும், நாடகப்பாடல்கள் வரைவதிலும் ஈடுபாடு கொண்ட இந்த இசைக்கலைஞர் பாடுவதிலும் வல்லவர். தமிழிசைப் பாடல்கள்(1956), மேடைப் பாடல்கள்(1957), தென்னவர் மன்னன்(1958), இசையணங்கு(1967), கவிதாஞ்சலி(1968), இசையருவி(1968), பேரறிஞர் அண்ணா (1968 இல் தந்தை பெரியார் வெளியிட்டது), ஏலகிரி(1968), காந்திஜி சரிதம்(1970), கவிஞன் குரல்(1970), உதிர்ந்த முத்துக்கள்(1972), முத்துக் குவியல்(1978), கனவுப்பூக்கள்(1978), ஸ்ரீ சத்ய சாயியின் தத்துவ மொழிகள்(1974), ஸ்ரீ காஞ்சிப் பெரியவரின் அருள் வாக்கு(1978), ஞானக்கடல்(1978), ஜோதிட நுணுக்கங்கள்(2003), காற்றினிலே வரும் கீதம், திருவேங்கடத் திருப்பதிகம், கீத கோவிந்தம் உள்ளிட்ட அறுபதுக்கும் மேற்பட்ட நூல்களை எழுதித் தம் எழுத்துப்பணியைத் தொய்வின்றிச் செய்து வருபவர்.

 கண்ணதாசனுடன் நெருங்கிய தொடர்பில் இருந்த நக்கீரன், கண்ணதாசனின் வெளியுலகிற்குத் தெரியாத உயர் பண்புகள் பலவற்றை உரையாடலில் பகிர்ந்துகொள்பவர். நாடகத்துறையில் அக்காலத்தில் புகழுடன் விளங்கிய மூத்த கலைஞர்களின் அகப் புற வாழ்க்கைகளை அறிந்து வைத்துள்ள நக்கீரன் ஒவ்வொருவரிடம் இருந்த உயர்ந்த ஆற்றல்களை எடுத்துரைக்கும் தகவல் களஞ்சியமாக விளங்குகிறார். இருபதாம் நூற்றாண்டின் இடைப்பகுதியில் எழுதிய எழுத்தாளர்கள், அவர்களின் படைப்புகள் குறித்த அரிய தகவல்களைத் தெரிந்துகொண்டு ஒரு நடமாடும் நூலகமாக வாழ்ந்து வருகின்றார்.

     சமூகச் சீர்திருத்தத்திலும், பகுத்தறிவிலும் சமரசம் செய்துகொள்ளாத இந்த முற்போக்குச் சிந்தனையாளர் அரசுக் கோப்புகளை ஆங்கிலத்தில் வரைந்தாலும் தமிழ்ச் சிந்தனையோடு பணியாற்றியவர். எந்த இடத்திலும் தம்மை முன்னிலைப்படுத்திக்கொள்ளாமல் இருக்கும் இவரின் எழுத்துப்பணியும், கலைப்பணியும் கவனிக்கப்பட வேண்டியவையாகும். இவரைப் போன்ற அறிஞர்களைக் காணும்பொழுது, “தொண்டைநாடு சான்றோருடைத்து” என்னும் பழந்தமிழ் வரிகள் உண்மைதான் என்ற முடிவுக்கு வரலாம்.

குறிப்பு: கட்டுரையை எடுத்தாள விரும்புவோர் எடுத்த இடம் குறிப்பிடுங்கள்.



செவ்வாய், 27 பிப்ரவரி, 2018

வரலாற்று அறிஞர் முனைவர் இல. தியாகராசன்


முனைவர் இல.தியாகராசன்(முதலில் நிற்பவர்) தம் நண்பர்களுடன்...

அரியலூர் அரசு கல்லூரியில் வரலாற்றுத்துறையின் தலைவராகவும், கல்லூரி முதல்வராகவும் பணியாற்றி ஓய்வுபெற்றுள்ள முனைவர் இல. தியாகராசன் அவர்களின் கல்வெட்டு ஆராய்ச்சிப் பணிகளையும், வரலாற்றுத்துறைக்கு அவர் வழங்கியுள்ள பங்களிப்புகளையும் அண்ணன் பொறியாளர் இரா. கோமகன் அவர்கள் எப்பொழுதும் நினைவூட்டிக்கொண்டே இருப்பார். அவர்போல் உடையார்பாளையம் அரண்மனையைச் சார்ந்த அரசகுடும்பத்து நண்பர்களும் பேராசிரியர் இல.தியாகராசன் அவர்களின் சிறப்புகளை அடிக்கடி எடுத்துரைப்பார்கள். அண்மையில் அவர்தம் அரியலூர் மாவட்டக் கல்வெட்டுக்கள், செப்பேடுகள் தொகுதி - 1 என்ற நூலைப் படிக்க நேர்ந்தது. தொடர்ச்சியாக அவர்தம் கங்கைகொண்டசோழபுரம் கல்வெட்டுக்கள் என்ற நூலையும் படிக்க நேர்ந்தது. பேராசிரியர் இல. தியாகராசன் அவர்களின் கடும் உழைப்பும், வரலாற்றுத்துறையில் அவருக்கு உள்ள பெரும் புலமையும் இந்த நூல்களின் வழியாகக் கண்டு வியப்புற்றேன். பெரும்பணியைச் செய்திருந்தாலும் இவர்களைப் போலும் அறிவாளர்கள் போற்றப்படாமல் உள்ளமை தமிழகத்தின் போகூழேயாகும். பேராசிரியர் அவர்களின் வாழ்க்கையையும், அவர்கள் செய்துள்ள பணிகளையும் உலகத் தமிழர்களின் பார்வைக்கு வைப்பதில் மகிழ்கின்றேன்.

திருவண்ணாமலை மாவட்டம் வேட்டவலம் என்னும் வரலாற்றுச் சிறப்புமிக்க ஊரில் வாழ்ந்த ம. இலட்சுமண நாயக்கர், அரங்கநாயகி ஆகியோரின் மகனாக இல. தியாகராசன் 15.11. 1955 இல் பிறந்தவர். வேட்டவலம் என்னும் ஊர், சங்க காலத்தில் திருக்கோவிலூர் மலையமான் மன்னர்கள் ஆண்ட மிலாடு(மலையமான் நாடு என்பதன் மருஉ) நாட்டின் தலைநகரமாக இருந்தது. கி.பி. 1151 இல் எழுதப்பட்ட இரண்டாம் இராசராசனின் கல்வெட்டில் “மிலாடான வேட்டைவலம்” என்று அழைக்கப்பட்டது. பின்னாளில் சமீன்தார்களின் ஆட்சியில் சிங்கவரம், சிங்கநகர் என்றெல்லாம் அழைக்கப்பட்டது. இத்தகு பெருமைக்குரிய ஊரில் பிறந்தவர் நம் பேராசிரியர் இல. தியாகராசன் அவர்கள்.

இல. தியாகராசன் பிறந்த ஊரான வேட்டவலத்தில் பள்ளியிறுதி வகுப்புவரை பயின்றவர். புகுமுக வகுப்பையும், இளங்கலை வகுப்பையும்(1975) திருவண்ணாமலையில் பயின்றவர். முதுகலைப் படிப்பை (வரலாறு) வாணியம்பாடி இசுலாமியாக் கல்லூரியில் பயின்றவர். சென்னைப் பச்சையப்பன் கல்லூரியில் பயின்று “சுதந்திரப் போராட்டத்தில் வடார்க்காடு மாவட்டத்தின் பங்கு” என்ற தலைப்பில் ஆய்வேடு பணித்து, இளம் முனைவர் பட்டம் பெற்றவர்(1979). 1980 இல் தமிழ்நாடு அரசின் தொல்பொருள் ஆய்வுத்துறையில் கல்வெட்டு, தொல்லியல் முதுகலைப் பட்டப் பெருஞ்சான்றிதழ்ப் பயிற்சி பெற்றவர்(1980). 1981 இல் கல்வியியல் பட்டம் பெற்றவர். தமிழ்நாட்டு அரசின் தொல்பொருள் ஆய்வுத்துறையில் வரலாற்றுக்கு முந்தைகால அகழாய்வாராய்ச்சிப் பிரிவின் அலுவலராகப் பணியாற்றியவர். 1982 முதல் அரியலூர் அரசு கலைக்கல்லூரியில் வரலாற்றுத்துறையில் பேராசிரியராகப் பணியில் இணைந்தார். பின்னர்த் துறைத்தலைவர், கல்லூரி முதல்வர் உள்ளிட்ட பல பொறுப்புகளை வகித்தவர்-. “அரியலூர் வட்டாரத்து வரலாற்றுத் தொல்லியல், கி.பி.1817 வரை - ஓர் ஆய்வு” என்ற தலைப்பில் முனைவர் பட்டத்திற்கு ஆய்வு செய்து, திருச்சிராப்பள்ளி பாரதிதாசன் பல்கலைக்கழகத்தின் வழியாகப் பட்டம் பெற்றவர். 2014 இல் கல்லூரிப் பணியிலிருந்து ஓய்வுபெற்ற பிறகும் தொடர்ந்து வரலாற்று ஆய்வுகளை ஆர்வமுடன் செய்துவருபவர்.

முனைவர் இல. தியாகராசன் கடந்த முப்பது ஆண்டுகளாகத் தமிழகத்தின் பல்வேறு இடங்களில் ஆய்வுசெய்து, வெளிவராத பல வரலாற்றுச் செய்திகளை, உலகிற்கு அறிவித்துள்ளார். அரியலூர், பெரம்பலூர் மாவட்டத்தின் பல்வேறு ஊர்களில் உள்ள கல்வெட்டுகள், தொல்லியல், கோவிற்கலை சார்ந்த ஆய்வுகளில் ஈடுபட்டு இவர் ஆற்றியுள்ள பணிகளுக்கு வரலாற்றுத்துறையினர் மிகுந்த நன்றிக்கடன்பட்டுள்ளனர். தம் கண்டுபிடிப்புகளைக் கட்டுரைகளாகவும், நூல்களாகவும், அறிக்கைகளாகவும் வெளியிட்டு மக்களுக்கு உண்மைத் தன்மையை எடுத்துரைத்துள்ளார்.

முனைவர் இல. தியாகராசனும் முனைவர் கோ. தங்கவேலுவும் இணைந்து எழுதிய சம்புவராயர் வரலாறு என்னும் நூல் வரலாற்றுத்துறை அறிஞர்களின் பெரும் பாராட்டினைப் பெற்றுள்ளது.

முனைவர் இல. தியாகராசன் திருவண்ணாமலை மாவட்டத்துக் கல்வெட்டுகள், கோவில்கள் குறித்து அரிய நூல்கள் பலவற்றை எழுதிவைத்துள்ளார். இராசேந்திர சோழனின் அனைத்துக் கல்வெட்டுகளும் அடங்கிய நூலினையும் உருவாக்கி வைத்துள்ளார். இவை யாவும் வெளிவரும்பொழுது தமிழகத்தின் வரலாறு துலக்கம் பெறும்.

இல. தியாகராசன் தம் கல்லூரிப் பணிகளுக்கு இடையே, தம் மாணவர்கள் வரலாற்று ஆர்வலர்களுடன் களப்பணிக்குச் சென்று பல்வேறு கல்வெட்டுகளை வெளிப்படுத்தியுள்ளார். தமக்குப் பிறகு கல்வெட்டுகளைப் படியெடுக்கும் வகையில் பல மாணவர்களை உருவாக்கியுள்ளார். அரியலூர் மாவட்டம் செயங்கொண்டம் பேருந்து நிலையத்துக்கு மேற்கில் உள்ள ஆவேரி என்னும் ஏரியில் இருந்த கல்வெட்டைக் கண்டுபிடித்து, வெளியிட்டபொழுது இப்பகுதி மக்களும் மாணவர்களும் மகிழ்ந்தனர்.

செயங்கொண்டசோழபுரம் என்று வரலாற்றில் குறிப்பிடப்படும் செயங்கொண்டமும் அதனைச் சார்ந்த பகுதிகளும் சோழர் ஆட்சியில் முதன்மை வாய்ந்த ஊர்களாக இருந்தன. சோழநாட்டின்மீது படையெடுத்த பாண்டிய மன்னன் மாறவர்மன் சுந்தரபாண்டியனின் படையினர் சோழ நாட்டின் ஊர்கள், ஏரிகள், வயல்கள் பலவற்றைச் சிதைத்தனர். இதனால் மக்கள் குடிநீருக்குத் தவித்தனர். செயங்கொண்டம் அக்காலத்தில் வணிக நகரமாக விளங்கியது. சாடவர்ம சுந்தரபாண்டியன் அரியணை ஏறியதும்(1251-1271). இவர் ஆட்சிக்காலத்தில் 1261 ஆம் ஆண்டு, பெரம்பலூரை அடுத்துள்ள நன்னை என்ற ஊரைச் சேர்ந்த திருவிக்கிரமன் என்பவர் செயங்கொண்டத்தில் இந்த ஏரியை உருவாக்கினார் எனவும், ஜெயங்கொண்ட சோழ பேராவி என்பது இக்குளத்தின் பெயர் எனவும், இப்பெயர் மருவி, ஆவேரி என்று மாறியது என்றும் முனைவர் இல. தியாகராசன் கல்வெட்டின் துணையால் படித்துக்காட்டியபொழுது ஆய்வாளர்கள் மகிழ்ந்தனர். ஊரினர் வியந்தனர்.

ஆவேரி கல்வெட்டு:
“ஸ்வதிஸ்ஸ்ரீ கோச்சடபன்மர் திருபுவநச் சக்கரவர்த்திகள் ஸ்ரீ சுந்தரபாண்டிய தேவற்க்கு யாண்டு ய-அவது வைய்காசி  மாத முதல் செயங்கொண்ட சோழப் பேராவி அகவாயில் நன்னையுடையார் திருவிக்கிரமற்  வெட்டின தன்மக்குளத்தில் யிறைக்குதல், நீர்பாச்சுதல் செய்ய நினைத்தார் உண்டாகில் நகரத் துரோகி நம்மி லொருத்தரல்ல உ." என்று உள்ளது.(அரியலூர் மாவட்டக் கல்வெட்டுக்கள், தொகுதி 1, பக்கம்177,178,179)

இவ்வாறு அரிய கல்வெட்டுகள் பலவற்றை வெளிப்படுத்தியும் படித்தும், உலகுக்கு அறிவித்துவரும் உண்மை ஆய்வாளரான முனைவர் இல. தியாகராசனின் தமிழ்ப்பணியும் வரலாற்றுப்பணியும் தொடர்வதாகுக.




முனைவர் இல. தியாகராசனின் தமிழ்க்கொடைகளுள் சில:

1.   சோழகேரளன்
2.   கானக்கிளியூர் நாடு
3.   கடந்தையார் வரலாறு
4.   அரியலூர் ஜமீன்தார்களின் கல்வெட்டுகளும் செப்பேடுகளும்
5.   வந்தலை வரலாறு
6.   வாலிகண்டபுரம் அருள்மிகு வாலீசுவரர் திருக்கோயில் தலவரலாறு
7. பெண்ணாகடம் அருள்மிகு வீற்றிருந்த பெருமாள் திருக்கோயில் வரலாறு
8.   நத்தம் ஆதிமூலப் பெருமாள் திருக்கோயில் தலவரலாறு
9.வெண்பாவூர் அருள்மிகு சொர்ணாம்பிகை உடனுறை சொர்ணபுரீஸ்வரர் திருக்கோயில் தல வரலாறு
10.கங்கைகொண்டசோழபுரம் வரலாறு(புதுச்சேரி பிரெஞ்சு ஆய்வு நிறுவனத்துடன் இணைந்து EFEO)
11.உடையவர் தீயனூர் அருள்மிகு அமிர்தாம்பிக்கை உடனுறை ஜமதக்னீஸ்வரர் திருக்கோயில் தலவரலாறு
12.விக்கிரமங்கலம் அருள்மிகு பூரணசந்திரகலாம்பிகை உடனுறை சோழீசுவரர் திருக்கோயில் தல வரலாறு
13. மேலப்பழுவூர் அருள்மிகு மீனாட்சியம்மன்  உடனுறை சுந்தரேசுவரர் தலவரலாறு
14. காமரசவல்லி அருள்மிகு பாலாம்பிகை உடனுறை சௌந்தரேஸ்வரர் கோயில் வரலாறு
15. கீழப்பழுவூர் அருள்மிகு அருந்தவ நாயகி உடனுறை ஆலந்துறையார் கோயில்
16. கீழையூர் அருள்மிகு அபிதகுஜாம்பாள் உடனுறை அகத்தீசுவரர்-சோழீசுவரர் கோயில்கள் வரலாறு
17. ஓலைப்பாடி அருள்மிகு சௌந்தரநாயகி உடனுறை பசுபதீசுவரர் கோயில் வரலாறு
18.ஸ்ரீபுரந்தான் அருள்மிகு பிரகன்நாயகி உடனுறை கைலாசநாதர் (பிரகதீஸ்வரர்) மற்றும் சிவபாதசேகர ஈசுவரர் (ஒட்டக்கோயில்) திருக்கோயில்கள் வரலாறு
19. செந்துறை-நெய்வனம்
20.அருள்மிகு பிரகன்நாயகி உடனுறை சிவதாண்டேஸ்வரர் திருக்கோயில் வரலாறு
21. சிறுகளப்பூர் அருள்மிகு காமாட்சியம்மன் உடனுறை காளத்தீசுவரர் திருக்கோயில் வரலாறு
22. வேட்டவலம் வரலாறு
23. வேட்டவலம் ஜமீன்வரலாறு
24. உடையார்பாளையம் ஜமீன் வரலாறு
25. ஆவூர் அகத்தீசுவரர் குகை வரதராசபெருமாள் கோயில்கள் வரலாறு
26. கோவிந்தப்புத்தூர் கங்காஜடாதீசுவரர் கோயில் வரலாறு
27. திருமழபாடி,கீழப்பழுவூர், பொம்மனப்பாடி கோயில்களின் தலவரலாறு
28. அரியலூர் மாவட்டக் கல்வெட்டுக்கள், செப்பேடுகள் தொகுதி-1, 2
29. அரியலூர் மாவட்ட வரலாறு
30. அரியலூர் மாவட்டக் கோயில்கள்
31. கல்வெட்டுக்கள் கூறும் அரியலூர் மாவட்ட ஊர்ப்பெயர்கள்
32. அரியலூர் அருள்மிகு கோதண்டராமசாமி திருக்கோயில் வரலாறு
33. பெரம்பலூர் மாவட்டக் கல்வெட்டுக்கள், செப்பேடுகள்
34. கல்வெட்டுக்கள் கூறும் பெரம்பலூர் மாவட்ட ஊர்ப்பெயர்கள்
35. பெரம்பலூர் மாவட்ட வரலாறு
36. பெரம்பலூர் மாவட்டக் கோயில்கள்
37. கங்கைகொண்டசோழபுரம் கல்வெட்டுக்கள்...

வெள்ளி, 23 பிப்ரவரி, 2018

மலேசியாவில் முதலாம் உலகத் தமிழ்க் குழந்தை இலக்கிய மாநாடு - 2018





     மலேசியத் தமிழ்ப் பண்பாட்டு இயக்கம், மலாயாப் பல்கலைக்கழக இந்திய ஆய்வியல் துறையின் ஆதரவுடன் முதலாம் உலகத் தமிழ்க் குழந்தை இலக்கிய மாநாட்டினை மலேசியத் தலைநகர் கோலாலம்பூரில் 2018, சூன் மாதம் 8,9,10(மூன்று நாள்) ஆகிய நாள்களில் நடத்துகின்றது. இந்த மாநாட்டின் கருப்பொருள் "புத்துலக வளர்ச்சிக்கேற்பத் தரமான குழந்தை இலக்கிய வளர்ச்சியை நோக்கி..." என்பதாகும்.  முனைவர் முரசு. நெடுமாறன் தலைவராகவும், மன்னர் மன்னன் மருதை செயலாளராகவும் இருந்து இந்த மாநாட்டினை நடத்துகின்றனர்.

     நலிந்துவரும் குழந்தை இலக்கிய வளர்ச்சிக்குப் புத்துயிரூட்டல், கற்றல் கற்பித்தல் முறைகளில் கவிதை, கதை, கட்டுரை, நாடகம் போன்ற குழந்தை இலக்கியங்களைப் பயன்படுத்தும் உத்திகளை ஆராய்தல், கணினித் தொழில்நுட்ப வளர்ச்சிக்கு ஏற்றவாறு வெளிவரும் படைப்புகளை ஊக்கப்படுத்துதல், புலம்பெயர்ந்த நாடுகளில் குழந்தை இலக்கியத்தின் நிலைகளை ஆராய்தல் என்பனவற்றை நோக்கமாகக் கொண்டு இந்த மாநாடு நடைபெறுகின்றது.

     முதலாம் உலகத் தமிழ்க் குழந்தை இலக்கிய மாநாட்டில் ஆய்வாளர்கள் குழந்தை இலக்கியம் குறித்த ஆய்வுக்கட்டுரைகளை வழங்கலாம். 15 மணித்துளிகளில் ஆய்வுக்கட்டுரை வழங்குமாறு தங்கள் ஆய்வுரையை மாநாட்டுக்கு அனுப்பலாம்.

·         ஆய்வுக்கட்டுரையின் சுருக்கம் அனுப்ப இறுதிநாள்: 15.03.2018
·         கட்டுரையின் முழுவடிவம் அனுப்ப இறுதிநாள்:  15.04.2018
·      ஆய்வுக்கட்டுரை அனுப்ப வேண்டிய 
   மின்னஞ்சல் முகவரி: info@childtamil.com
·         இணையதள முகவரி: www.childtamil.com

பின்வரும் தலைப்புகளைத் தழுவி ஆய்வுக்கட்டுரையைப் படைக்கலாம்:

· நலிந்துவரும் குழந்தை இலக்கிய வளர்ச்சிக்குப் புத்துயிரூட்டும் வழிமுறைகள்.
·         நாட்டுப்புறச் சிறுவர் பாடல்களும் புதிய குழந்தைப் பாடல்களும்
·         குழந்தைகளுக்கான கதைப்பாடல்கள், காவியங்கள் - ஒரு நோக்கு
·         அழ. வள்ளியப்பாவிற்கு முன்பும் பின்பும்
·   கணினிக் காலத்திற்கேற்ற குழந்தை இலக்கியத் தோற்றத்திற்குரிய வழிவகைகளை ஆராய்தல்
·         புலம்பெயர்ந்த நாடுகளில் குழந்தை இலக்கியத்தின் நிலை
·         கற்றல் கற்பித்தலில் கவிதையைப் பயன்படுத்தும் உத்திகள்
·   தமிழ் மழலையர்க்கான கதை, கட்டுரை, நாடக நூல்கள்- ஒரு பார்வை

மாநாட்டுப் பதிவுக்கட்டணம்:

மலேசியப் பேராளர்களுக்கு: 300 மலேசிய வெள்ளி
மாணவர்களுக்கு: 100 மலேசிய வெள்ளி
அயலகப் பேராளர்களுக்கு: 250 அமெரிக்க டாலர்
இந்திய, இலங்கைப் பேராளர்களுக்கு: 100 அமெரிக்க டாலர்

தொடர்பு முகவரி:

ICOCIT Secretarieat, No. 50 A,
First Floor, Jalan 1/19, Seksyen 1,
46000 Petaling Jaya,
Selangor D.E.
Malaysia

ஞாயிறு, 18 பிப்ரவரி, 2018

வரலாற்றைத் தேடிய ஓர் இனிய பயணம்!...


குடுமியான்மலை இசைக் கல்வெட்டு

               பழைய வரலாறுகளை அறிந்துகொள்வதிலும் ஆவணப்படுத்துவதிலும் எனக்கு எப்பொழுதும் ஈடுபாடு உண்டு. அதற்குத் தகுந்தாற்போல் நான் பணிபுரியும் கல்வி நிறுவனங்களில் மாணவர்களுக்குப் பயிற்றுவிக்க எனக்கு ஒதுக்கப்படும் பாடங்களும் அமைந்துவிடும். கல்வெட்டியல், நாட்டுப்புறவியல், சங்கப்பாடல்கள், இலக்கணம் என்று நான் பயிற்றுவிக்கும் பாடங்கள் இருக்கும். அதுபோல் இன்றைய புதிய தொழில்நுட்பம் சார்ந்த இணையத் தமிழைக் கற்பிக்கவும் எனக்கு வாய்ப்பு அமையும். அதனால்தான் பழைய செய்திகளைத் தேடி எடுப்பதும் அதனைத் தொழில்நுட்பத்தைப் பயன்படுத்தி மக்கள் மன்றத்துக்குக் கொண்டு செல்வதும் என் விருப்பமான வேலையாக உள்ளது. எனவேதான் என் பேராசிரிய நண்பர் முனைவர் ப.இரவிக்குமார் அவர்கள் என்னைப் பற்றி ஒருவரியில் ஒரு மதிப்பீடு செய்தார். அந்த மதிப்பீடு இதுதான்: பழைமை + புதுமை » மக்கள் = மு.இளங்கோவன்.

     முந்தைய வரலாற்றை அறிந்துகொள்ளும் ஒரு மாணவனாக வரலாற்றுச் சிறப்புமிக்க சில இடங்களுக்குச் செல்லும் வாய்ப்பு அண்மையில் எனக்கு அமைந்தது. உடன் என்னிடம் பயிலும் மாணவர்களையும் அழைத்துச்செல்லும் பொறுப்பு எனக்கு வழங்கப்பட்டது. மாணவர்கள் இருபதின்மரும், என்னுடன் பணியாற்றும் பேராசிரியர்கள்  மூவருமாக நாங்கள் கங்கைகொண்ட சோழபுரத்திற்கு முதலில் சென்றோம். என் பிறந்த ஊர் என்பதால் அங்குள்ள சிற்பங்கள், கட்டடக்கலை அமைப்புகள், கல்வெட்டுச் செய்திகள், வாய்மொழி வரலாறுகள் அனைத்தையும் மாணவர்களுக்கு நேரில் அறிமுகம் செய்யும் வாய்ப்பினைப் பெற்றேன்.

     எங்கள் சுற்றுலாக்குழு அடுத்து, அருகில் உள்ள திருப்பனந்தாள் காசித்திருமடத்திற்குச் சென்றது. திருப்பனந்தாளில் உள்ள செஞ்சடையப்பர் திருக்கோவில் பாடல்பெற்ற இடம் என்பதைத் திருமுறை அன்பர்கள் நன்கு அறிவர். அதுபோல் திருப்பனந்தாளின் முகவரியாக விளங்கும் காசித்திருமடம் சார்பில் செந்தமிழ்க் கல்லூரி நடைபெற்றதையும் (இன்று கலை, அறிவியல் கல்லூரியாக மலர்ந்துள்ளது), சைவ இலக்கியங்களும், சாத்திர நூல்களும் இங்குக் கணக்கின்றிப் பதிப்பிக்கப்பட்டு, உலக மக்களுக்குக் குறைந்த விலையில் கிடைக்கப்பெறுகின்றமையும் தமிழுலகம் நன்கு அறியும். நீதிநெறி விளக்கம், மீனாட்சியம்மை பிள்ளைத் தமிழ், முத்துக்குமாரசாமி பிள்ளைத் தமிழ் உள்ளிட்ட அருந்தமிழ்ப் பனுவல்களை ஆக்கித் தந்த தமிழ் மாமுனிவர்  குமரகுருபர அடிகளாரின் மரபில் செழித்து வளரும் திருமடம் இது என்பதையும் இவண் நினைவூட்ட விரும்புகின்றேன். திருப்பனந்தாள் மடத்தின் ஆயிரம் உருவா தமிழ்ப்பரிசில் உலகப் புகழ்பெற்ற ஒன்றாகும். தமிழ்த்தாத்தா உ.வே.சா. அவர்களைப் புரந்தருளிய திருமடம் திருப்பனந்தாள் மடம் என்பதையும் இங்குக் கவனத்தில் கொள்ள வேண்டும். இந்த மடத்தினை அருளாட்சி செய்துவரும் தவத்திரு. முத்துக்குமாரசாமித் தம்பிரான் அடிகளார் அவர்களைச் சந்தித்துக் காசித்திருமடத்தின் பதிப்புப்பணிகளை அறிந்துகொள்ளச் சென்றோம். எங்களை அன்புடன் வரவேற்ற திருமடத்தினர் எங்களுக்கு உரிய செய்திகளை மகிழ்வுடன் வழங்கினர். சில நூல்களையும் மாணவர்கள் அனைவருக்கும் அன்பளிப்பாக வழங்கினர்.

தாராசுரம்கோவில் இசைப்படிக்கட்டுகள்


     எங்களின் சுற்றுலாக்குழு அடுத்ததாகக் கும்பகோணம் எனப்படும் குடந்தையை அடுத்துள்ள தாராசுரம் கோவிலுக்குச் சென்றது. இங்கு இரண்டாம் இராசராசன் காலத்தில் கட்டப்பெற்ற அரிய கோயில் உள்ளது. இங்குள்ள சிற்பங்களும், கல்வெட்டுகளும் பழந்தமிழகத்துச் செய்திகளைப் பாதுகாத்து வைத்துள்ளன. இந்தியத் தொல்லியல்துறை உள்ளிட்ட அமைப்புகளால் இக்கோயில் சிறப்பாகப் பாதுகாக்கப்படுகின்றது. இங்குள்ள இசைப்படிக்கட்டுகளை எந்தமிழ் மக்கள் சிதைத்தமை கண்டு வேலியிட்டுப் பாதுகாக்கின்றனர். ஒவ்வொரு படியிலும் ஒரு சுரத்திற்குரிய இசை தோன்றுமாறு இந்தப் படிக்கட்டு அமைக்கப்பட்டுள்ளதை அறிந்து வியந்தோம்.

     பகலுணவு நேரத்துக்குத் தஞ்சையைச் சென்றடைந்த நாங்கள், மராட்டிய அரசர்களின் அரண்மனை, அங்குள்ள அரசவை, காட்சியகம், கல்வெட்டுகள், சிற்பங்கள், ஓவியங்களைப் பார்த்து மகிழ்ந்தோம். நான் இளம் முனைவர் பட்டம் பயின்றபொழுது (1992-93) மராட்டியர் ஆட்சியில் தமிழகமும் தமிழும் என்ற தலைப்பில் ஆய்வு செயததால் இந்த இடமும், வரலாறும் எனக்கு நன்கு அறிமுகமானவை. அவற்றை மாணவர்களுடன் பகிர்ந்துகொண்டேன். சரசுவதி மகால் நூலகத்தின் அமைப்பினையும், பதிப்புப் பணிகளையும் கூடுதலாக அறிந்தோம். அங்குக் காட்டப்படும் ஒலி, ஒளிக் காட்சிக்கூடத்தில் ஒளிபரப்பப்பட்ட தஞ்சாவூர் சிறப்புரைக்கும் விவரணப்படம் அருமையாக இருந்தது. அரைமணி நேரத்தில் தஞ்சாவூர் மாவட்டத்தின் பெருமைகளை மிகச் சிறப்பாகத் தெரியவைத்தனர். குளிரூட்டப்பட்ட அழகிய அரங்கில் இந்த ஆவணப்படத்தை அனைவரும் விரும்பிப் பார்த்துச் செல்கின்றனர். அனைத்துக்குமாக முன்பே நுழைவுச்சீட்டை வாங்கிக்கொண்டு செல்ல வேண்டியிருந்தது.

     முதல்நாள் மாலைப்பொழுதின் நிறைவு நிகழ்வாக அடுத்து நாங்கள் தஞ்சாவூர்ப் பெரிய கோவிலுக்குச் சென்றோம். அங்கு நல்லாசிரியர் கரந்தை செயக்குமார் அவர்கள் தம் ஆசிரிய நண்பருடன் இணைந்து எங்களை வரவேற்றுத் தஞ்சைப் பெருவுடையார் கோவிலின் வரலாற்றையும் சிறப்புகளையும் எடுத்துரைத்தார். தஞ்சாவூர் கோயிலின் தொன்மை, வேற்று நாட்டினரின் படையெடுப்புகள், போற்றுவாரின்றிக் கிடந்த கோவிலின் சிறப்பை ஆங்கிலேயர்கள் உலகுக்கு அறிவித்தமை, அங்கு நடைபெற்ற ஆய்வுகள், வெளிவந்த நூல்கள் யாவற்றையும் எங்களுக்கு எடுத்துரைத்தார். தஞ்சாவூரில் உள்ள கல்வெட்டுகளில் ஆடற்கலைக்கும், கோவில் பராமரிப்புக்கும் அரசன் செய்துள்ள கொடைகளைக் கரந்தை செயக்குமார் நினைவூட்டினார். மாணவர்களும் தாங்கள் கற்ற வரலாற்று, கல்வெட்டுப் பாடங்களை நினைவூட்டினர். தஞ்சாவூர் கோவிலில் நடைபெற்ற பரதநாட்டிய நிகழ்வுகளைச் சிறிது நேரம் பார்த்துவிட்டு, புதுக்கோட்டையை நோக்கி எங்கள் மகிழ்வுந்து புறப்பட்டது. புதுக்கோட்டையில் இரவு தங்கினோம்.

     சுற்றுலாவின் இரண்டாம் நாள் காலையில் தங்கியிருந்த இடத்திலிருந்து காலை 9 மணிக்குப் புறப்பட்டோம். எங்களுடன் பேராசிரியர் முத்தழகன் அவர்கள் இணைந்துகொண்டார்கள். புதுக்கோட்டை சார்ந்த வரலாற்றுச் செய்திகளை இவர் விரல்முனையில் வைத்திருப்பவர். பேராசிரியர் பே.க.வேலாயுதம் ஐயாவிடம் பயிற்சி எடுத்தவர் என்பதால் தமிழார்வமும், வரலாற்று ஈடுபாடும் இவருக்கு மிகுதியாக உண்டு. அனைவரும் 9.30 மணியளவில் சித்தன்னவாசல் சென்றடைந்தோம். எங்களின் மூடுந்துப் பயணத்திலேயே பேராசிரியர் முத்தழகன் புதுக்கோட்டை வரலாற்றுச் சிறப்புகளை எடுத்துரைத்தார். ஒவ்வொரு ஊர்ப்பெயருக்கும் உரிய வரலாற்றை நினைவூட்டினார். சாலையின் இருமருங்கிலும் இருந்த கற்பதுக்கைகளை அறிமுகம் செய்தார். சமண மதம் புதுக்கோட்டைப் பகுதியில் சிறப்பாக வளர்ச்சி பெற்றிருந்ததை வரலாற்றுச் சான்றுகளுடன் எங்களுக்கு நினைவூட்டினார். சித்தன்னவாசலை நெருங்கினோம். அன்னவாசல் என்ற ஊரின் அருகில் இருப்பதால் இந்த ஊர் சித்தன்னவாசல் (சிறிய அன்னவாசல்) என்று அழைக்கப்படுகின்றது (தமிழர்களின் பெயரிடும் முறை நினைந்து வியந்தேன்).

கற்பதுக்கைகள்

கற்பதுக்கைகள்

சித்தன்னவாசல் முகப்பு

     சித்தன்னவாசல் பாறை ஓவியங்களைப் பார்வையிட உரிய நுழைவுச்சீட்டை வாங்கிக்கொண்டு, பெரும் மலைப்பாறையில் குடையப்பட்டுள்ள குடைவரைக் கோவிலுக்குச் செல்லும் முன்பாகச் சில படங்களை நினைவுக்கு எடுத்துக்கொண்டோம். வரலாற்றுப் பாட நூல்களில் படித்த சித்தன்னவாசல் ஓவியச் சிறப்பை நேரில் கண்டு வியந்தோம். தாமரைப் பொய்கையும், அன்னப்பறவைகளும், நாட்டிய மங்கையர்களுமாக இருந்த ஓவியங்களின் நுணுக்கமான பகுதிகளைப் பேராசிரியர் முத்தழகன் எங்களுக்கு விளக்கினார். இதுவரை சித்தன்னவாசல்  சார்ந்து நடந்துள்ள ஆய்வுகளையும், ஆய்வாளர்களையும், அவர்கள் வெளியிட்டுள்ள நூல்களையும் எங்களுக்கு அறிமுகம் செய்தார். ஆய்வாளர்கள் தங்கள் ஆய்வில் தடுமாறி நின்றுள்ள இடங்களையும் எங்களுக்கு எடுத்துரைத்தார். அங்கிருந்த கல்வெட்டுகள், எழுத்துகள், சமண முனிவர்களின் சிலைகள் யாவற்றையும் நின்று, நிதானித்துப் பார்த்தோம். சித்தன்னவாசல் ஓவியத்தைப் பிரிய மனமின்றிப் பிரிந்து, மலைமீது இருக்கும் ஏழடிப்பாட்டம் சமணப்படுக்கை நோக்கிப் புறப்பட்டோம்.
ஏழடிப்பாட்டம்

     மலையடிவாரத்தில் பெயர்ப்பலகை நின்று ஏழடிப்பாட்டம் பகுதியின் சிறப்பை எடுத்துரைக்கின்றது. முன்பு மலையில் ஏறுவதற்கு வசதிகள் இல்லாமல் இருந்ததையும், இப்பொழுது படிக்கட்டுகள், பாதுகாப்புக் கம்பிகள் அமைக்கப்பட்டுள்ளதையும் பேராசிரியர் முத்தழகன் எடுத்துரைத்தார். பாதுகாப்புக்குக் காவலர்கள் இருப்பதால் அச்சமின்றி மலைக்குச் செல்ல இயலும். மலையின் உயரே சமண முனிவர்கள் படுப்பதற்குப் படுக்கைகள் 17 அமைக்கப்பட்டுள்ளன. அதில் தமிழி எழுத்துகளில் வெட்டப்பட்ட கல்வெட்டுகள் உள்ளன. அரிய வரலாற்றுக் குறிப்புகளைக் கொண்டதாக அக்கல்வெட்டுகள் இருப்பினும் நம் கல்லாக் காளையரும், கழிநிலைப் பாவையரும் தத்தம் பெயர்களைப் பொறித்து, பழைமையைச் சிதைத்துள்ளதைக் கண்டு மனம் வருந்தினேன். நம்மவர்களின் மூடத்தனம் எண்ணிக் குமைந்தேன். சமணர் பள்ளிகள் காற்றோட்டமும் வெளிச்சமும் நிறைந்து காணப்படுகின்றன. எத்தனை அறிவர்கள் இந்த இடத்தில் கால்பதித்தனரோ என்று எண்ணியவாறு அங்கிருந்து மலையடிவாரம் வந்தோம். இது நிற்க.

சமணர் படுக்கை(ஏழடிப்பாட்டம்- சித்தன்னவாசல்)

சமணர் படுக்கையில் பழைய கல்வெட்டு

மு.இளங்கோவன், பேராசிரியர் முத்தழகன்(சமணர் படுக்கை செல்லும்வழி)

     சித்தன்னவாசலிலிருந்து புறப்பட்ட நாங்கள் குடுமியான்மலை இசைக் கல்வெட்டுகளைக் காண்பதற்குப் புறப்பட்டோம் இடையில் சாலையோரங்களில் இருந்த சில சமணச் சிற்பங்களைக் கண்டோம். சமண மதத்தைச் சார்ந்த நல் உள்ளம் கொண்ட பெரியோரின் முயற்சியால் சமணச் சிற்பங்கள் வேலியிட்டுப் பாதுகாப்பது எங்களுக்குப் பெரும் ஆறுதலாக இருந்தது.
சமணச் சிற்பம் அருகில் மு.இ.(அன்னவாசல்)

     குடுமியான்மலையின் பெயர்க்காரணம் என்ன என்று பேராசிரியர் முத்தழகனிடம் கேட்டேன். திருநலக்குன்றம் என்பது இந்த ஊரின் பெயர் எனவும் நலம் என்பதைச் சுகம் என்றாக்கி, சுகம் என்பது சிகை என்றாக்கி, சிகை என்பது குடுமி என்றாக்கி, இன்று குடுமியான்மலை என்று ஆகிவிட்டது என்றார்.. பல்யாகசாலை  முதுகுடுமி என்ற பாண்டிய மன்னன் பெயரையும் இணைத்துப் பார்க்க எனக்குத் தோன்றியது. இதுவும் நிற்க.

 குடுமியான்மலையின் திருக்கோயில் பின்னாளில் அழகிய சிற்ப வேலைப்பாடுகளுடன் வடிவமைக்கப்பட்டுள்ளது. பழைய கோவில் என்பது பாறையைக் குடைந்து வடிவமைத்துள்ளனர். புதிய கோவிலைக் கடந்து, பழைய கோவிலுக்குச் சென்றோம். கோவில் பகுதிகளில் தேனீக்களின் பெருங்கூட்டு வாழ்க்கையினைக் கண்டோம். ஒலி எழுப்பாமல் வருமாறு பாதுகாவலர்கள் கூறினர். அனைவரும் பேச்சின்றி, நடந்து அங்குள்ள இசைக்கல்வெட்டுகளைத் தூரத்திலிருந்து பார்த்தோம். மாணவர்கள் அனைவரும் அடுத்த பகுதிக்குச் சென்ற பிறகு, தேனீயின் தாக்குதல் நடந்தாலும் எதிர்கொள்ளும் முன்னேற்பாட்டுடன் நான்மட்டும் இசைக்கல்வெட்டினை நெருங்கிப் பார்த்தேன். சில படங்கள் எடுத்துக்கொண்டேன். இசைக்கல்வெட்டு சமற்கிருத மொழியில் கிரந்த எழுத்துகளில் இருப்பதை முன்பே படித்துள்ளேன். தமிழ்ச்செய்திகள்தான் இவ்வாறு பிறமொழிகளிலும், பிற எழுத்துகளிலும் எழுதப்பட்டுள்ளன. கிரந்த எழுத்தில் எழுப்பட்டிருந்ததைப் படி எடுத்தவர்கள் தேவநாகரி எழுத்தில் படி எடுத்துள்ளனர் என்பதைப் பின்பு அறிந்தேன். எத்தனை இடியாப்பச் சிக்கலில் தமிழனின் இசையறிவு உள்ளது என்பதை அறிந்து மனம் கவன்றது. நம்மிலிருந்து பிரிந்துபோன இசையுண்மைகளை அறிய இயலாத நிலைக்கு வருந்தி, மீண்டும் ஒருமுறை தனித்து வந்து இந்த இடத்தை ஆராய வேண்டும் என்ற முடிவுடன் அடுத்த பகுதியில் இருந்த மலைக்குடைவரைக் கோவிலுக்குச் சென்றேன்.

குடுமியான்மலை இசைக்கல்வெட்டு அருகில் மு.இ.

பரிவாதிநி என்ற இசை குறித்த கல்வெட்டு

     மலைக்குவடைவரையில் சிவன்கோவில் உள்ளது. பரிவாதிநி என்று எழுதப்பட்ட இசைக்குறிப்பு அடங்கிய கல்வெட்டு ஒன்றும், வேறு சில கல்வெட்டுகளும் அங்கு இருந்தன. அவற்றை எழுத்து, எழுத்தாகத் தடவிப்பார்த்து, வியந்தேன். 


 பரிவாதிநி என்று குறிப்பிடப்படும் இசைக்கல்வெட்டு பற்றியோ, குடுமியான் மலை இசைக்கல்வெட்டு பற்றியோ முற்று முழுதான தெளிவான விளக்கம் இதுவரை கிடைக்கவில்லை என்று சொல்லலாம். ஆனால் ஆய்வாளர்கள் தொடர்ந்து பல நூல்களையும், கட்டுரைகளையும் வரைந்து தம் ஆய்வுகளைத் தொடர்ந்தவண்ணம் உள்ளமையை அறிந்தபொழுது உண்மைகளை நெருங்கிக்கொண்டுள்ளோம் என்பது புலப்பட்டது. குடுமியான்மலை இசைக்கல்வெட்டு 1904 இல் கண்டுபிடிக்கப்பட்டுள்ளது எனவும் முனைவர் டி.என்.இராமச்சந்திரன் என்பவர் 1931 இல் இதுபற்றி எழுதியுள்ளார் எனவும், முனைவர் பிரேமலதா உள்ளிட்ட ஆய்வாளர்கள் இதுபற்றி ஆராய்ந்து எழுதியுள்ளனர் எனவும் அறிந்தேன். பரிவாதிநி இசைக்குறிப்புக் கல்வெட்டுடன் தொடர்புடைய செய்திகள் வேறு சில கோவில் கல்வெட்டுகளில் உள்ளதையும் அறிந்தேன்( இது பற்றி விரித்துப் பின்னர் எழுதுவேன்)
திருநலக்குன்றம் என்று எழுதப்பட்டுள்ள குடுமியான்மலைக் கல்வெட்டு

குடுமியான்மலை இசைக்கல்வெட்டுகள் பற்றி விபுலாநந்த அடிகளார் தம் யாழ்நூலில் விரிவாக எழுதியுள்ளார். மூத்த அறிஞர் வ.ஐ.சுப்பிரமணியம் அவர்கள் இந்த ஊரைப் பார்வையிட்டு வியந்ததாகவும் அறிந்தேன். இவ்வாறு மக்கள் பார்வையில் படும்படி இசைச்செய்திகள் குடைவரைக் கல்வெட்டில் பதிந்துள்ளமையால் இசையறிஞர்கள், மாணவர்கள் ஒன்றுகூடும் இடமாக இந்த ஊர் இருந்திருக்க வாய்ப்பு உண்டு. மேலும் சமற்கிருதத்தில் கல்வெட்டு இருப்பதாலும், கிரந்த எழுத்தால் செய்திகள் எழுதப்பட்டுள்ளதாலும், தமிழும் இக்கல்வெட்டில் ஆளப்பட்டுள்ளதாலும் நீள நினைந்து ஆழப்பயின்றால் பல்வேறு உண்மைகளை வெளிக்கொண்டு வர இயலும்.(இதுவும் நிற்க)

     குடுமியான்மலையைப் பார்வையிட்ட நாங்கள் திருமயம் (திருமெய்யம்)  கோட்டையையும் பார்வையிட்டோம். எங்கள் பயணம் அடுத்ததாகக் கீழடி அகழாய்வு இடம் நோக்கி அமைந்தது. இடையில் நெடுமறம் என்ற ஊரில் வண்டியை நிறுத்திப் பகலுணவு உண்டோம். திருப்பத்தூர் கடந்து, மதுரை மேலூர் வழியாக, வைகையாற்றைக் கடந்து சிலைமான் வழியாகக் கீழடியை மாலை 4.30 மணியளவில் அடைந்தோம். கீழடி இயற்கை எழில் சூழ்ந்த பகுதியாக இருந்தது; வாழையும், தென்னையும் வளத்தைக் காட்ட, செழித்திருந்தன. தென்னந்தோப்புக்கு இடையில் நுழைந்து அகழாய்வு நடைபெற்ற இடங்களைக் கண்டோம். அகழாய்வு நடைபெற்ற இடங்கள் பணி முடிந்ததால் பாதுகாப்பாக மூடப்பட்டிருந்தன.  முன்பே சென்றிருந்தால் அகழாய்வுப் பணிகளை நேரில் பார்த்திருக்கலாம். இருப்பினும் உரிய இடத்தை நேரில் கண்ட மன நிறைவும், அருகில் வாழ்ந்தவர்களிடம் அகழாய்வுப் பணிகள் குறித்து உரையாடி, விவரம் பெற்ற மகிழ்ச்சியும் எங்களுக்கு இருந்தது. கீழடி நிலங்களில் கிடந்த சில பானை ஓடுகள், செங்கல் சிதைவுகளை நினைவுக்கு எடுத்துக்கொண்டு மதுரை ஆலவாய் அண்ணலுடன் உறையும் அங்கயற்கண்ணி அம்மையையும் அவர்கள் எழுந்தருளியிருக்கும் கோவிலையும் காண்பதற்கு எங்கள் குழு ஆயத்தமானது...!